2008 წლის აგვისტოს ომის შემდეგ საოკუპაციო ძალების მიერ, ე.წ. საზღვრის უკანონოდ გადაკვეთის ბრალდებით დაკავებულთა შორის 491 ქალია. საქართველოს სახელმწიფო უსაფრთხოების სამსახურის ინფორმაციით, 2009-2022 წლებში ჯამში ცხინვალის რეგიონის მიმართულებით 172 ქალი დააკავეს, აფხაზეთის მიმართულებით კი 319.
“ოკუპირებული ცხინვალის მიმართულებით, ზოგადად, პირთა უკანონო პატიმრობა ძირითადად 2-3 დღე გრძელდება, თუმცა არსებობს შემთხვევები, როდესაც უკანონოდ დაკავებულებს, გამოგონილი ბრალდებებით, გრძელვადიან უკანონო პატიმრობაში ტოვებენ. ოკუპირებული ცხინვალისგან განსხვავებით, ოკუპირებული აფხაზეთის მიმართულებით უკანონოდ დაკავების პერიოდი გაცილებით ხანგრძლივია”,-აცხადებენ სუს-ში.
საოკუპაციო ძალების მიერ ე.წ. საზღვრის გადაკვეთისთვის, საქართველოს მოქალაქეების დაკავების ფაქტები 2009 წლიდნ გახშირდა. ბოლო 13 წლის განმავლობაში, აღნიშნული ბრალდებით, ჯამში 3360 მშვიდობიანი მოქალაქე დააკავეს, მათ შორის 500-მდე ქალია.
